PRAVASIVARTHA

സാധാരണ ഇന്ത്യൻ പാസ്പോർട്ട് കൈവശമുള്ളവരും യുകെയിലോ യൂറോപ്യൻ യൂണിയൻ രാജ്യങ്ങളിലോ യുഎസ് ഗ്രീൻ കാർഡോ താമസ വിസയോ ഉള്ളവരുമായ ഇന്ത്യക്കാർക്ക് പ്രത്യേക നിർദേശം. 14 ദിവസത്തെ സന്ദർശനത്തിനായി യുഎഇയിൽ പ്രവേശിക്കുന്നതിന്, മുൻകൂട്ടി അംഗീകരിച്ച വിസ-ഓൺ-അറൈവൽ ലഭിക്കുന്നതിന് ആദ്യം ഓൺലൈനായി അപേക്ഷിക്കണമെന്ന് നിർദേശം. ഈ ഹ്രസ്വകാല വിസ 14 ദിവസത്തേക്ക് കൂടി നീട്ടാൻ സാധിക്കുമെന്നും ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) അറിയിച്ചു.

യോഗ്യരായ ഇന്ത്യൻ യാത്രക്കാർക്ക് ഏതാനും വർഷങ്ങളായി യുഎഇ വിമാനത്താവളങ്ങളിൽ വിസ ഓൺ അറൈവൽ അനുവദിച്ചിരുന്നു. യാത്രക്കാർ അവരുടെ ഫ്ലൈറ്റുകളിൽ നിന്ന് ഇറങ്ങുമ്പോൾ വിസ സാധാരണയായി ഇമിഗ്രേഷൻ കൗണ്ടറിൽ സ്റ്റാമ്പ് ചെയ്യും. ഇപ്പോൾ, ദുബായിലേക്കുള്ള യാത്രക്കാർ ആദ്യം സേവനത്തിനായി ഓൺലൈനായി അപേക്ഷിക്കേണ്ടതുണ്ട്.

ഹ്രസ്വകാല സന്ദർശന വിസയ്ക്ക് ആവശ്യമായി വരുന്ന രേഖകൾ

1. രാജ്യത്ത് പ്രവേശിക്കുന്നതിനുള്ള സാധുവായ പാസ്‌പോർട്ട് അല്ലെങ്കിൽ യാത്രാ രേഖ
2. യുഎസ്എ നൽകുന്ന സ്ഥിര താമസ കാർഡ് (ഗ്രീൻ കാർഡ്) അല്ലെങ്കിൽ യുകെ അല്ലെങ്കിൽ യൂറോപ്യൻ യൂണിയൻ രാജ്യങ്ങൾ നൽകുന്ന റസിഡൻസ് വിസ.
3. വ്യക്തിഗത ഫോട്ടോ (വെളുത്ത പശ്ചാത്തലം)

പ്രീ-അംഗീകൃത വിസ-ഓൺ-അറൈവലിന് അർഹതയുള്ള ഇന്ത്യൻ വിനോദസഞ്ചാരികൾ ആദ്യം ജിഡിആർഎഫ്എ വെബ്‌സൈറ്റിൽ ലോഗിൻ ചെയ്യണം. തുടർന്ന് അവരുടെ വിശദാംശങ്ങൾ രജിസ്റ്റർ ചെയ്യണം, ആവശ്യകതകൾ പൂരിപ്പിച്ച് ഫീസ് അടയ്ക്കണം ( 253 ദിർഹം). അംഗീകാരിച്ചാൽ അത് വിസ ഉപയോക്താവിൻ്റെ ഇമെയിലിലേക്ക് അയയ്ക്കും. ആപ്ലിക്കേഷൻ കഴിഞ്ഞ് 48 മണിക്കൂറിനുള്ളിലാണ് സ്ഥിരീകരണം ലഭിക്കുക.

ഹ്രസ്വകാല സന്ദർശന വിസയുടെ നിബന്ധനകളും വ്യവസ്ഥകളും ഇപ്രകാരമാണ്;

1. യാത്രികന് യുഎഇയിൽ പ്രവേശിക്കുന്നതിൽ നിന്ന് തടയുന്ന തരത്തിലുള്ള യാതൊരു നിയന്ത്രണവും ഉണ്ടാകരുത്
2. പാസ്‌പോർട്ടിൻ്റെയോ യാത്രാ രേഖയുടെയോ സാധുത 6 മാസത്തിൽ കുറയാത്തതാകണം.
3. 6 മാസത്തിൽ കുറയാത്ത സാധുതയുള്ള, യോഗ്യതയുള്ള യുഎസ് അധികാരികൾ നൽകുന്ന വിസയോ ഗ്രീൻ കാർഡോ ഉണ്ടായിരിക്കണം.
4. അയാൾക്ക് യുകെയിലോ യൂറോപ്യൻ യൂണിയൻ രാജ്യങ്ങളിലോ യോഗ്യതയുള്ള അധികാരികൾ നൽകുന്ന താമസ വിസ ഉണ്ടായിരിക്കണം, അതിൻ്റെ കാലാവധി 6 മാസത്തിൽ കുറയാത്തതാകണം.