PRAVASIVARTHA

ഡെങ്കിപ്പനി ബാധിച്ച് മരണപ്പെടുന്ന ​പ്രവാസികളുടെ​ മൃതദേഹം നാട്ടിലെത്തിക്കുന്നതിൽ പ്രതിസന്ധി. യുഎഇയിൽ മൃതദേഹങ്ങൾ എംബാം ചെയ്യാത്തത് കൊണ്ട് ഇന്ത്യയിലെ വിമാനക്കമ്പനികൾ നാട്ടിലേക്ക്​ കൊണ്ടുപോകാൻ തയാറാകാത്തത് ആണ് ഈ പ്രതിസന്ധിക്ക് കാരണം. യുഎഇയിൽ നിന്ന്​ എംബാം ചെയ്യാത്ത മൃതദേഹങ്ങൾ കൊണ്ടുപോകുന്നത്​ ദുബായ് വിമാന സർവ്വീസ്​ കമ്പനിയായ എമിറേറ്റ്​സ്​ ​എയർലൈൻ മാത്രമാണ്​​. എന്നാൽ, എമിറേറ്റ്​സ്​ എയർലൈൻസിന്​ തിരുവനന്തപുരത്തേക്കും കൊച്ചിയിലേക്കും മാത്രമാണ് നിലവിൽ​ സർവ്വീസുള്ളത്​. ആറു​മാസം മുമ്പ് കേന്ദ്ര സർക്കാർ​ കൊണ്ടുവന്ന നിയമത്തെ തുടർന്ന്​ എംബാം ചെയ്ത മൃതദേഹങ്ങൾ നാട്ടിലെത്തിക്കുന്നതിലും പ്രതിസന്ധി തുടരുകയാണ്.​ മൃതദേഹം നാട്ടിലേക്ക്​ കൊണ്ടുപോകാൻ​ എംബാമിങ്​ ചെയ്ത സർട്ടിഫിക്കറ്റ്​ ഏത്​ എയർലൈൻസിലാണോ നാട്ടിലേക്ക്​ കൊണ്ടുപോകുന്നത്​ ആ എയർലൈൻസിൻറെ നാട്ടിലെ ഓഫിസിലേക്ക്​ അയക്കണം. ഇവർ ഇത്​ ഡൽഹിയിലെ ഓഫീസിലേക്ക്​​ അയച്ച് ഇവിടെ നിന്ന്​ അനുമതി നൽകിയാൽ മാത്രമേ മൃതദേഹം കൊണ്ടുപോകാൻ അനുമതി ലഭിക്കുള്ളൂ. ഡൽഹിയിൽ നിന്ന്​ അനുമതി ലഭിക്കാൻ കാലതാമസം നേരിടുന്നുണ്ടെന്നാണ്​ ഈ രംഗത്ത് ഉള്ളവർ പറയുന്നത്​. എംബാമിങ്ങിന്​ നാലു മുതൽ അഞ്ചു മണിക്കൂർ വരെ സമയമെടുക്കുന്നതും പ്രതിസന്ധിക്ക് കാരണമാകുന്നുണ്ട്. ഇത്​ പരിഹരിക്കാൻ കേന്ദ്ര സർക്കാറിന്​ പലതവണ അപേക്ഷ നൽകിയെങ്കിലും ഒരു നടപടിയും സ്വീകരിച്ചിട്ടില്ല.

തിരുവനന്തപുരത്തേക്ക്​ ദിവസവും രാവിലെ 9.30ന്​ പുറപ്പെടുന്ന ഒരു സർവ്വീസും കൊച്ചിയിലേക്ക്​ പുലർച്ചയുള്ള രണ്ട്​ സവ്വീസുകളുമാണ് ഉള്ളത്.​​കണ്ണൂരിലേക്കും കോഴിക്കോട്ടേക്കും എമിറേറ്റ്സിന്​ സർവ്വീസില്ല. ഇതുമൂലം കഴിഞ്ഞ ദിവസം ​ഡെങ്കിപ്പനി ബാധിച്ച്​ മരിച്ച കണ്ണൂ​ർ സ്വദേശിയായ 50കാരിയുടെ മൃതദേഹം കൊച്ചിയിൽ എത്തിച്ച് അവിടെ നിന്ന്​ ഫ്രീസർ സൗകര്യമുള്ള ആംബുലൻസിലാണ്​ കണ്ണൂരിൽ കൊണ്ട് വന്നത്​. ​ ഇത്തരത്തിലുള്ള സംഭവങ്ങൾ പ്രവാസികളുടെ ബന്ധുക്കൾക്ക്​ മാനസികവും സാമ്പത്തികവുമായി വലിയ പ്രയാസം സൃഷ്ടിക്കുന്നുണ്ട്​. ഈ മാസം 21ന്​ മരിച്ച തിരുവനന്തപുരം സ്വദേശിയായ 30കാരൻ അജിത്തിൻറെ മൃതദേഹം മൂന്നു ദിവസത്തിന് ചൊവ്വാഴ്ചയോടെ നാട്ടിലെത്തിക്കാനാകു​മെന്ന പ്രതീക്ഷയിലാണ്​​ ബന്ധുക്കൾ​. നടപടിക്രമങ്ങൾ പൂർത്തിയാക്കാൻ സമയമെടുത്തതോടെ തിങ്കളാഴ്ച രാവിലെ 9.30ന്​ ഉണ്ടായിരുന്ന എമിറേറ്റ്​സ്​ സർവ്വീസിൽ കൊണ്ടുപോകാൻ സാധിച്ചിരുന്നില്ല. അതോടെയാണ്​ ചൊവ്വാഴ്ച വരെ കാത്തിരിക്കേണ്ടിവന്നത്​. യുഎഇയിലെ വാർത്തകളും വിവരങ്ങളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക
https://chat.whatsapp.com/Gng8TrrjGT6FCFNH1KiDVV