PRAVASIVARTHA

UAE Recruitment Agencies അബുദാബി: യുഎഇയിൽ റിക്രൂട്ടിങ് ഏജൻസികളുടെ പ്രവർത്തനത്തിന് കർശന മാനദണ്ഡങ്ങൾ ഏർപ്പെടുത്തി മാനവ വിഭവശേഷി സ്വദേശിവത്കരണ മന്ത്രാലയം (എംഒഎച്ച്ആർഇ). താത്കാലിക, സ്ഥിരം ജീവനക്കാരുടെ റിക്രൂട്ടിങ് നടപടികളിൽ നിർണായക പങ്കുവഹിക്കുന്ന ഏജൻസികളുടെ പ്രവർത്തനം സുതാര്യമാക്കുന്നതിന്‍റെ ഭാഗമായാണ് നടപടി. റിക്രൂട്ടിങ് ചൂഷണത്തിൽ നിന്നോ ദുരുപയോഗത്തിൽ നിന്നോ തൊഴിലാളികളെയും തൊഴിലുടമകളെയും സംരക്ഷിക്കുകയാണ് ഇതിലൂടെ ലക്ഷ്യമാക്കുന്നത്. പുതിയ വ്യവസ്ഥകൾ പാലിക്കുന്ന ഏജൻസികൾക്ക് മാത്രമേ റിക്രൂട്ടിങ് ലൈസൻസ് ലഭിക്കുകയുള്ളൂ. ലൈസൻസ് പുതുക്കുന്നവരും നിബന്ധനകൾ പാലിക്കുന്നുണ്ടെന്ന് ഉറപ്പാക്കുമെന്ന് മന്ത്രാലയം വ്യക്തമാക്കി. തൊഴിലുടമ ആഗ്രഹിക്കുന്ന വിധം യോഗ്യതയുള്ള ഉദ്യോഗാർഥിയെ കണ്ടെത്തി നിയമിക്കാൻ റിക്രൂട്ടിങ് ഏജൻസിക്ക് അനുമതിയുണ്ട്. അംഗീകൃത ലൈസൻസും സാമ്പത്തിക കെട്ടുറപ്പുമുഉള്ള ഏജൻസികളാണ് റിക്രൂട്മെന്റ് നടത്തുന്നതെന്ന് മന്ത്രാലയം ഉറപ്പാക്കും. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക https://chat.whatsapp.com/KpmqRbHQBz88D2o8Opt0Oe തൊഴിലുടമകൾക്കും തൊഴിലന്വേഷകർക്കും ഗുണം ചെയ്യുന്നതിന്‍റെ ഭാഗമായാണ് നടപടികൾ കർശനമാക്കിയത്. റിക്രൂട്ടിങ് ലൈസൻസിന് അപേക്ഷിക്കുന്നവരുടെ ക്രിമിനൽ പശ്ചാത്തലം പരിശോധിക്കും. അപേക്ഷകര്‍ ഒരു വർഷത്തിനിടെ മനുഷ്യക്കടത്ത് ഉൾപ്പെടെ കുറ്റകൃത്യങ്ങൾക്ക് ശിക്ഷിക്കപ്പെടാത്തവരും സത്യസന്ധരും ആയിരിക്കണം. ലൈസൻസിന്റെ ഇനമനുസരിച്ച് മൂന്ന് മുതൽ 10 ലക്ഷം ദിർഹം വരെ നിർബന്ധിത ബാങ്ക് ഗാരന്‍റി സമർപ്പിക്കണം. സാമ്പത്തിക വിശ്വാസ്യത ഉറപ്പാക്കുന്നതിന് ക്രെഡിറ്റ് റിപ്പോർട്ട് നിർബന്ധമാക്കിയിട്ടുണ്ട്. അപേക്ഷകനോ ബിസിനസ് പങ്കാളിയോ ജീവിതപങ്കാളിയോ സർക്കാർ ജീവനക്കാരല്ലെന്ന് ഉറപ്പാക്കുന്ന സത്യവാങ്മൂലം സമർപ്പിക്കണം. റിക്രൂട്ടിങ് ഏജൻസിക്ക് അനുയോജ്യമായ സ്ഥലമായിരിക്കണം തെരഞ്ഞെടുക്കേണ്ടത്. നിബന്ധനകൾ പാലിക്കാത്ത അപേക്ഷകൾ തള്ളിപ്പോകുന്നതാണ്.